Listas de materiais de subcontratación coa app de Fabricación de Odoo
Nesta publicación centrarémonos nun tipo concreto de lista de materiais, o Tipo de LdM = Subcontratación, que é o tipo de lista de materiais que nos permite subcontratar a un provedor un proceso produtivo que se realizará sobre un material subministrado por nós. Esta lista de materiais permite a automatización e o control do proceso de entrega da materia prima e da recepción do produto subcontratado.
Unha lista de materiais en Odoo pódese crear desde a propia ficha de produto ou desde a ruta: Fabricación → Produtos → Lista de materiais → Novo.
Formulario de Lista de materiais en Odoo:
- Produto: Neste caso, o artigo que imos subcontratar. Este pode ser un produto final ou intermedio.
- Cantidade: Contía e unidade de medida sobre as que se aplica esta lista de materiais.
- Referencia: Nome e/ou código da lista de materiais.
- Tipo de LdM: Neste caso seleccionaremos Subcontratación.
- Subcontratistas: Listaxe de provedores aos que podemos contratar a subcontratación deste produto.
Lapelas do formulario de Lista de materiais en Odoo:
- Compoñentes: Nesta lapela indicaremos os compoñentes desta lista de materiais. Para engadir un compoñente debemos facer clic en Engadir unha liña.
- Compoñente: Produto que será enviado ao provedor no proceso de subcontratación.
- Cantidade: Contía necesaria do compoñente para a fabricación/subcontratación desta lista de materiais.
- Unidade de medida do produto: É a unidade de medida do compoñente. Por norma xeral xa provén da ficha do produto.
- Varios:
- Consumo flexible: Permítenos configurar como se comportará o consumo de materiais na orde de fabricación.
- De xeito estrito (Bloqueado). É dicir, o consumo dos compoñentes sempre é o estipulado na lista de materiais.
- Ou de xeito flexible (Permitido ou Permitido con advertencia), de tal maneira que as cantidades consumidas dos compoñentes na orde de fabricación poden ser editadas e distintas ás teóricas da lista de materiais.
- Enrutamento: Permite definir rutas loxísticas para establecer regras de almacén e reabastecemento.
- Distribución analítica: Permite configurar as contas analíticas ás que imputar as posteriores ordes de fabricación do produto desta lista de materiais.
- Prazo de fabricación: Tempo habitual empregado para fabricar o produto desta lista de materiais unha vez confirmada a orde de fabricación.
- Días para preparar a orde de fabricación: Prazo para crear e confirmar as ordes de fabricación con antelación co obxectivo de ter tempo suficiente para repoñer compoñentes, xa sexan comprados ou fabricados internamente.
É importante revisar a ficha da materia prima que se enviará ao provedor, xa que para que Odoo entenda que está vinculada ao proceso de subcontratación, na súa ruta débese indicar Reabastecer o subcontratista por pedido.
Unha vez configuradas a lista de materiais e a materia prima xa podemos comprar en Odoo. O proceso de subcontratación de fabricación non deixa de ser unha compra, co matiz de que somos nós mesmos os que subministramos a materia prima para obter despois o produto desexado.
Esta compra pódese ter creado de xeito automático tras crear unha orde de fabricación ou mediante unha regra de reabastecemento, pero neste caso crearémola de xeito manual seguindo estes pasos: Compra --> Solicitudes de orzamento --> Novo.
Seleccionamos un Provedor que estea incluído na Lista de materiais como Subcontratistas. Seleccionamos o Produto que se vai subcontratar, que ten configurada a súa Lista de materiais con Tipo de LdM = Subcontratación.
Unha vez que consideremos que o orzamento de compra é correcto e chegamos a un acordo co provedor, facemos clic en Confirmar pedido.
Ao tratarse dunha compra de subcontratación, non só se crea unha Recepción, senón que se crea un Reabastecer.
Este Reabastecer atópase dentro da app de Inventario como unha operación de Reabastecer o subcontratista e é o albará que permite o envío da materia prima ao provedor.
Unha vez enviada a materia prima, o provedor realizará o seu traballo e, cando estea rematado, recibiremos o produto subcontratado mediante a Recepción en Inventario e o proceso concluirá coa facturación de provedor.
Segue aprendendo sobre Odoo
- Tipos de listas de materiais en Odoo
- Listas de materiais para fabricar en Odoo
- Como crear ordes de fabricación en Odoo
- Odoo Fabricación y Odoo Compras
Queres implantar Odoo Fabricación na túa empresa? En Anubía axudámosche a configuralo segundo os teus procesos. Contacta connosco.